అక్షరటుడే, వెబ్ డెస్క్: సదరం శిబిరాలను ఈనెల 7, 21, 28 తేదీల్లో నిర్వహించనున్నట్లు డీఆర్డీవో సాయ గౌడ్ శనివారం ఒక ప్రకటనలో తెలిపారు. ఈ మేరకు దివ్యాంగులు ఆగస్టు 4న ఉదయం 11:30 గంటల నుంచి మీసేవ కేంద్రాల్లో స్లాట్ బుక్ చేసుకోవాలని సూచించారు. కొత్త సదరం సర్టిఫికెట్ తో పాటు రెన్యూవల్ చేసుకునే వారు రూ.35 చెల్లించి రశీదు పొందాలని, ఇదివరకే స్లాట్ బుక్ చేసుకున్న వారికి రిజిస్టర్డ్ మొబైల్ నెంబర్ కు క్యాంపు తేదీ, స్థలం వివరాలు మెసేజ్ మెసేజ్ రూపంలో వస్తుందన్నారు. జిల్లా ప్రభుత్వ ఆస్పత్రిలో ఉదయం 10 నుంచి ఒంటి గంటల వరకు క్యాంప్ నిర్వహిస్తారని తెలిపారు. స్లాట్ బుక్ చేసుకున్నవారు రశీదుతో పాటు మీసేవలో ఇచ్చిన పాస్ పోర్ట్ సైజ్ ఫొటో, ఆధార్ కార్డు జిరాక్స్, సంబంధిత ధ్రువపత్రాలతో హాజరు కావాలని, లేనిపక్షంలో తిరస్కరిస్తారని పేర్కొన్నారు. సర్టిఫికెట్ రెన్యూవల్ చేసుకునే వారు పాత సర్టిఫికెట్ తో పాటు సంబంధిత మెడికల్ రిపోర్టులు తేవాలన్నారు. సదరం సర్టిఫికెట్ గడువు ముగిసిన వారు త్వరగా రెన్యూవల్ చేసుకోవాలని, లేనిపక్షంలో చేయూత పింఛన్ నిలిచిపోతుందన్నారు.
