అక్షరటుడే, నిజామాబాద్ రూరల్: తెయూ యూనివర్సిటీ సౌత్ క్యాంపస్ ప్రిన్సిపాల్‌ డాక్టర్ సుధాకర్‌గౌడ్‌ రాష్ట్రస్థాయి ఉత్తమ ఉపాధ్యాయ అవార్డుకు ఎంపికయ్యారు. ఉపాధ్యాయ దినోత్సవాన్ని పురస్కరించుకుని రాష్ట్రప్రభుత్వం ఆయనను ఎంపిక చేసింది. మునిపల్లికి చెందిన సుధాకర్‌గౌడ్‌ ఉపాధ్యాయ వృత్తిలో అంచెలంచెలుగా రాణిస్తూ వర్సిటీ సౌత్ క్యాంపస్ లో జియో ఇన్ఫర్మాటిక్స్‌ విభాగంలో అధ్యాపకుడిగా చేరి ప్రిన్సిపాల్‌గా పరిపాలన బాధ్యతలు నిర్వహిస్తున్నారు. ఆఫ్రికాలోని ఇథియోపియా జిమ్మా విశ్వవిద్యాలయంలో అసిస్టెంట్‌ ప్రొఫెసర్‌గా పనిచేసినా, మాతృభూమిపై మక్కువతో తెయూలో ఉద్యోగ బాధ్యతలు చేపట్టారు. ఇంటర్, తెలుగు అకాడమీ, అంబేద్కర్‌ ఓపెన్‌ యూనివర్సిటీ పుస్తక రచయితగానూ సేవలందించారు. ఆయన ఉత్తమ ఉపాధ్యాయ అవార్డుకు ఎంపిక కావడంపై తెయూ రిజిస్ట్రార్‌ ప్రొఫెసర్‌ యాదగిరి, సౌత్ క్యాంపస్ అధ్యాపకులు, సిబ్బంది, విద్యార్థులు హర్షం వ్యక్తం చేశారు.
