అక్షరటుడే, ఇందల్వాయి : Indalwai | తన భూమి కొనుగోలు చేసిన బీఆర్ఎస్ నాయకుడు డబ్బులు ఇవ్వకుండా వేధిస్తున్నాడని ఓ మహిళా పురుగుల మందు తాగి ఆత్మహత్యాయత్నం చేసింది. బాధితురాలు తెలిపిన వివరాల ప్రకారం.. ఇందల్వాయి మండలం తిర్మన్పల్లి గ్రామానికి చిన్న సంధ్యారాణి తన భూమిని మూడేళ్ల క్రితం బీఆర్ఎస్ నాయకుడికి విక్రయించింది. కొంత డబ్బు చెల్లించిన ఆయన.. మిగతా డబ్బులు ఇవ్వడం లేదు. మూడేళ్లుగా డబ్బులు అడుగుతున్నా పట్టించుకోవడం లేదు.
ఈ క్రమంలో బుధవారం ఆయన ఇంటికి వెళ్లి డబ్బుల కోసం నిలదీయగా ఆయనతో పాటు కుటుంబ సభ్యులు తనపై దాడి చేశారని బాధితురాలు వాపోయింది. ఈ మేరకు వారి ఇంటి ముందే సెల్ఫీ వీడియో తీసుకొని పురుగుల మందు తాగింది. తనకు న్యాయం చేయాలని వేడుకుంది. ఈ వీడియోను పలు గ్రూపులలో ఆమె పోస్ట్ చేసింది. కాగా విషయం తెలుసుకున్న పోలీసులు సంధ్యారాణిని ఆస్పత్రికి తరలించారు. ప్రస్తుతం ఆమె బాగానే ఉన్నట్లు వైద్యులు తెలిపారు. కాగా.. ఈ విషయమై బాధితురాలి నుంచి ఫిర్యాదు తీసుకొని దర్యాప్తు చేస్తామని పోలీసులు తెలిపారు. బాధితురాలి సెల్ఫీ వీడియో ప్రస్తుతం సోషల్ మీడియాలో వైరల్ అవుతోంది.
