అక్షరటుడే, నిజామాబాద్‌అర్బన్‌: నగర శివారులోని దాస్‌నగర్‌ వద్ద ఓ కారు బీభత్సం సృష్టించింది. ఆదివారం మధ్యాహ్నం రోడ్డు పక్కన నడుచుకుంటూ వెళ్తున్న పలువురుపైకి వెన్యూ కారు దూసుకెళ్లింది. ఈ ప్రమాదంలో ఇద్దరు మహిళలు అక్కడికక్కడే మృతి చెందారు. మరో ఇద్దరు పిల్లలకు తీవ్ర గాయాలయ్యాయి. డ్రైవర్‌ అజాగ్రత్త వల్లే ప్రమాదం చోటు చేసుకున్నట్లు తెలిసింది. పోలీసులు ఘటనా స్థలానికి చేరుకుని విచారణ జరుపుతున్నారు. అయితే దాస్‌నగర్‌ వద్ద గల బాలికల గురుకుల పాఠశాల ఉండడంతో ఆదివారం పిల్లలతో మాట్లాడేందుకు తల్లిదండ్రులు వచ్చారు. పిల్లలతో రోడ్డు పక్కన ముచ్చటిస్తుండగా ఈ దుర్ఘటన చోటు చేసుకుంది. ప్రమాదానికి కారణమైన వ్యక్తిని స్థానికులు చితకబాదారు. అనంతరం అతన్ని పోలీసులు అదుపులోకి తీసుకున్నారు.
