అక్షరటుడే, ఆర్మూర్‌: నీటి కుంటలోకి కారు దూసుకెళ్లడంతో ఒకరు మృతి చెందిన ఘటన వేల్పూర్‌ మండలం పోచంపల్లి శివారులో సోమవారం చోటు చేసుకుంది. స్థానికులు తెలిపిన వివరాల ప్రకారం.. పడిగెల్‌కు చెందిన రైతు గాదెపల్లి రమేశ్‌ పోచంపల్లిలోని తన పొలం పనుల నిమిత్తం కూలీలను తీసుకుని కారులో వెళ్లాడు. పొలం వద్ద వారిని దింపి కారును రివర్స్‌ చేసుకునే సమయంలో నీటి కుంటలోకి దూసుకెళ్లింది. కారు నీటిలో మునిగిపోవడంతో రమేశ్‌ మృతి చెందాడు. వేల్పూర్‌ ఎస్సై వినయ్ ఘటనా స్థలానికి చేరుకుని గజ ఈతగాళ్ల సాయంతో కారు బయటకు వెలికి తీశారు. రమేశ్‌ మృతదేహాన్ని బయటకు తీసి పోస్టుమార్టం నిమిత్తం తరలించారు. కేసు నమోదు చేసుకుని దర్యాప్తు చేస్తున్నారు.
