అక్షరటుడే, కామారెడ్డి: భయం వీడి.. ప్రణాళికతో పరీక్షలకు సిద్ధమైతే తప్పక విజయం వరిస్తుందని కలెక్టర్ జితేష్‌ వి పాటిల్‌ అభ్యర్థులకు సూచించారు. శనివారం కామారెడ్డి ప్రభుత్వ డిగ్రీ కళాశాలలో గ్రూప్‌-1, 2, 3 తదితర పోటీ పరీక్షలకు సన్నద్ధమతున్న 54 మంది ఎస్సీ అభ్యర్థులకు కలెక్టర్ స్టడీ మెటీరియల్‌ అందించారు. ఈ సందర్భంగా ఆయన మాట్లాడుతూ.. పోటీ పరీక్షలకు సిద్ధమవుతున్న అభ్యర్థులు సిలబస్‌ను ఆకళింపు చేసుకొని.. స్వతహాగా నోట్స్‌ తయారు చేసుకోవడంతో పాటు కరెంట్‌ అఫైర్స్‌పై ప్రత్యేక దృష్టిపెట్టి పట్టుదలతో సన్నద్ధం కావాలని సూచించారు. ఎంత క్లిష్టమైనా సమర్థవంతంగా పరీక్ష రాయగలమనే ఆత్మవిశ్వాసంతో ముందుకెళ్లాలని పేర్కొన్నారు. కార్యక్రమంలో ఎస్సీ అభివృద్ధి అధికారి రజిత, సహాయ ఎస్సీ అభివృద్ధి అధికారి వెంకటేశ్‌, కళాశాల ప్రిన్సిపాల్‌ విజయ్‌ కుమార్‌, టీఎన్జీవోస్‌ అధ్యక్షుడు వెంకట్‌ రెడ్డి తదితరులు పాల్గొన్నారు.
