అక్షరటుడే, జుక్కల్‌: ఘోర రోడ్డు ప్రమాదంలో ఇద్దరు వ్యక్తులు అక్కడికక్కడే మృతి చెందిన సంఘటన పెద్ద కొడప్‌గల్‌ మండలంలోని బేగంపూర్‌ గేటు వద్ద శనివారం చోటు చేసుకుంది. స్థానికుల కథనం ప్రకారం.. మానేపూర్‌కు చెందిన రియాజుద్దీన్‌, శాంతాపూర్‌కు చెందిన శివరాం కలిసి టీవీఎస్‌ ఎక్సెల్‌పై బేగంపూర్‌ గేటు వద్ద ఎన్ హెచ్ 161 రోడ్డు దాటుతున్నారు. ఈక్రమంలో హైదరాబాద్‌ నుంచి మహారాష్ట్ర వైపు వేగంగా వెళ్తున్న ఫార్చూనర్‌ కారు వారి ద్విచక్ర వాహనాన్ని ఢీకొట్టింది. టీవీఎస్‌ ఎక్సెల్‌పై ఉన్న ఇద్దరు ఎగిరిపడి అక్కడికక్కడే మృతి చెందారు. కారు స్తంభాన్ని ఢీకొట్టడగా.. బెలూన్స్‌ తెరుచుకోవడంతో వాహనంలోని ఇద్దరు గాయాలతో బయటపడ్డారు. ఇక ద్విచక్ర వాహనాకి మంటలు అంటుకుని దగ్ధమైంది. సంఘటనా స్థలానికి పెద్దకొడప్‌గల్‌ ఎస్సై కోనారెడ్డి, బిచ్కుంద ఎస్సై మోహన్‌ రెడ్డి, పిట్లం ఎస్సై నిరేష్‌ చేరుకొని ప్రమాదానికి గల కారణాలను తెలుసుకున్నారు. కేసు నమోదు చేసుకొని దర్యాప్తు చేస్తున్నట్లు పేర్కొన్నారు.
