అక్షరటుడే, వెబ్‌డెస్క్‌ : సికింద్రాబాద్‌ బొల్లారంలోని రాష్ట్రపతి నిలయం వేదికగా భారతీయ కళామహోత్సవ్‌ ప్రారంభమైంది. తెలంగాణలో రాష్ట్రపతి ద్రౌపది ముర్ము పర్యటనలో భాగంగా శనివారం భారతీయ కళా మహోత్సవ్‌ మెదటి ఎడిషన్‌ను ఇక్కడ ప్రారంభించారు. సందర్శకుల కోసం సెప్టెంబర్‌ 29 నుంచి అక్టోబర్‌ 6 వరకు ఉదయం 10 గంటల నుంచి రాత్రి వరకు 8గంటల వరకు అందుబాటులో ఉంటుంది. ఎనిమిది రోజుల పాటు జరిగే ఈ ఉత్సవాలను ఈశాన్య ప్రాంత అభివృద్ధి మంత్రిత్వ శాఖ, సాంస్కృతిక శాఖ సహకారంతో రాష్ట్రపతి నిలయం నిర్వహిస్తోంది. ఈవేడుకలో హైదరాబాద్‌ ప్రజలందరూ పాల్గొనే అవకాశం కల్పించినందుకు రాష్ట్రపతి ద్రౌపది ముర్ముకి సీఎం రేవంత్‌రెడ్డి ధన్యవాదాలు తెలిపారు. ఈమేరకు తెలంగాణ సీఎంవో నుంచి ఎక్స్‌ వేదికగా ఇవాళ ఓ ప్రకటన విడుదల చేశారు.
