అక్షరటుడే, ఇందూరు: పీసీసీ అధ్యక్షుడిగా బాధ్యతలు స్వీకరించిన మహేష్ కుమార్ గౌడ్ మొదటిసారి జిల్లాకు రానున్న నేపథ్యంలో జిల్లా కమిటీ తరఫున ఘన స్వాగతం పలకనున్నట్లు డీసీసీ అధ్యక్షుడు మానాల మోహన్ రెడ్డి తెలిపారు. గురువారం సభా ప్రాంగణం పాత కలెక్టరేట్ మైదానంలో విలేకరుల సమావేశం నిర్వహించారు. ఈ సందర్భంగా ఆయన మాట్లాడుతూ.. మహేష్ కుమార్ గౌడ్ శుక్రవారం మధ్యాహ్నం 1 గంటలకు మాధవ్ నగర్ చేరుకొని ప్రత్యేక పూజలు చేస్తారన్నారు. అనంతరం 1.30 గంటలకు బోర్గం కమాన్ నుంచి ర్యాలీగా పులాంగ్, హైదరాబాదు రోడ్డు, ఎల్లమ్మ గుట్ట చౌరస్తా మీదుగా పాత కలెక్టరేట్ మైదానానికి చేరుకుంటారన్నారు. అక్కడ బహిరంగ సభ ఉంటుందన్నారు. కార్యకర్తలు భారీగా తరలిరావాలని కోరారు. ఇప్పటికే పార్కింగ్ కోసం మూడు స్థలాలను కేటాయించినట్లు తెలిపారు. ట్రాఫిక్ ఇబ్బంది కలగకుండా చూడాలని పోలీసు సిబ్బందిని కోరారు. సమావేశంలో ఉర్దూ అకాడమీ చైర్మన్ తాహెర్ బిన్ హందాన్, పీసీసీ ప్రధాన కార్యదర్శి గడుగు గంగాధర్, నగర కాంగ్రెస్ అధ్యక్షులు కేశ వేణు, పీసీసి ప్రధాన కార్యదర్శి నగేష్ రెడ్డి, సీనియర్ నాయకులు రత్నాకర్, ప్రచార కమిటీ మెంబర్ జావేద్ అక్రమ్, పీసీసీ డెలిగేట్ శేఖర్ గౌడ్, జిల్లా యూత్ కాంగ్రెస్ అధ్యక్షుడు విక్కీ యాదవ్, ఎన్ఎస్‌యూఐ అధ్యక్షుడు వేణు రాజ్, రాష్ట్ర ప్రధాన కార్యదర్శి విపుల్ గౌడ్ పాల్గొన్నారు.
