అక్షరటుడే, ఎల్లారెడ్డి : గ్రామీణ ప్రాంత క్రీడాకారులు జాతీయ, అంతర్జాతీయ స్థాయికి ఎదగాలని ఎల్లారెడ్డి ఎమ్మెల్యే మదన్ మోహన్ రావు సూచించారు. గాంధారి మండలం పేట్ సంగేం గ్రామంలో నిర్వహించిన మండల స్థాయి అంతర్ పాఠశాలల క్రీడాపోటీలను గురువారం ప్రారంభించారు. అనంతరం క్రీడాజ్యోతిని వెలిగించి విద్యార్థుల గౌరవ వందనాన్ని స్వీకరించారు. ఈ సందర్భంగా ఆయన మాట్లాడుతూ.. తన చిన్ననాటి జ్ఞాపకాలను గుర్తు చేసుకుంటూ.. ఎర్రపాడు గ్రామంలో చదువుకున్నప్పుడు అప్పటి ఎమ్మెల్యే తాడూరి బాలాగౌడ్ వచ్చి ఇలానే క్రీడా పోటీలను ప్రారంభించారని పేర్కొన్నారు. ఎల్లారెడ్డి నియోజకవర్గంలోని క్రీడాకారులు ఆటల్లో రాణించాలనే ఉద్దేశంతో గాంధారిలో మినీ స్టేడియం మంజూరు చేసినట్లు తెలిపారు. కార్యక్రమంలో కాంగ్రెస్ కార్యకర్తలు, నాయకులు, ఉపాధ్యాయులు తదితరులు పాల్గొన్నారు.
