అక్ష‌ర‌టుడే, వెబ్‌డెస్క్‌: TGPSC | తెలంగాణ పబ్లిక్ సర్వీస్ కమిషన్ గ్రూప్స్ ఫలితాల విడుదలకు షెడ్యూల్ ప్రకటించింది. ఈనెల 10 నుంచి 18వ తేదీ లోపు గ్రూప్స్–1, 2, 3 ఫలితాలను వెల్లడించనున్నట్లు తెలిపింది. రాష్ట్రంలో 563 గ్రూప్–1 పోస్టుల భర్తీకి నిర్వహించిన ప్రధాన పరీక్షల జవాబు మూల్యాంకనం ముగిసింది. అభ్యర్థులు సాధించిన మార్కుల ఆధారంగా 1:2 నిష్పత్తిలో మెరిట్ జాబితా వెల్లడించేందుకు టీజీపీఎస్సీ పరిశీలన చేస్తోంది.
TGPSC | షెడ్యూల్ ఇదే..
మార్చి 10న గ్రూప్–1 ఫలితాలను విడుదల చేయనున్నారు. అదేరోజు అభ్యర్థుల ప్రొవిజినల్ మార్కుల వివరాలను వెల్లడించనున్నారు. అనంతరం ఆయా అభ్యర్థుల ధృవీకరణ పత్రాల పరిశీలన టీజీపీఎస్సీ నిర్వహించనుంది. మార్చి 11న గ్రూప్–2 జనరల్ ర్యాంకింగ్ జాబితాను ప్రకటించనుంది. 14న గ్రూప్–3 జనరల్ ర్యాంకుల జాబితా విడుదల చేయనుంది. 17న హాస్టల్ వెల్ఫేర్ ఆఫీసర్, 19న ఎక్స్టెన్షన్ ఆఫీసర్ తుది ఫలితాలు అధికారులు వెల్లడించనున్నారు.
