అక్షరటుడే, వెబ్ డెస్క్: పార్లమెంట్ ఎన్నికలు సమీపిస్తున్న వేళ నిజామాబాద్ ఎంపీ ధర్మపురి అరవింద్ కీలక వ్యాఖ్యలు చేశారు. తాను అహంకారంతో వ్యవహరిస్తున్నానని ఎమ్మెల్సీ జీవన్ రెడ్డి వ్యాఖ్యానించడం సరికాదన్నారు. తనకు జీవన్ రెడ్డి ఎప్పుడు ఎదురుపడినా నమస్కరించి ఆశీర్వాదం తీసుకునే వాడినని గుర్తు చేశారు. ఎన్నికలు వచ్చిన ప్రతిసారి ఇవే తనకు చివరి ఎన్నికలుగా చెప్పుకొని ఓట్లు అడిగే వ్యక్తి జీవన్ రెడ్డి అని వ్యాఖ్యానించారు. ఎన్నికల్లో హుందాగా కొట్లాడుదామని ఇలాంటి చిల్లర రాజకీయాలు వద్దని హితవు పలికారు. అంతా రామమయం, మోదీ మయం నడుస్తుందని.. బీజేపీని తట్టుకోవడం ఎవరి తరం కాదన్నారు. ఇద్దరం కలిసి పార్లమెంట్ ఎన్నికల్లో కొట్లాడుదామని, అయినప్పటికీ తానే స్వయంగా మీ వద్దకు వచ్చి ఆశీర్వాదం తీసుకుంటానని జీవన్ రెడ్డికి తెలిపారు. ఏప్రిల్ నెలలో పార్లమెంట్ ఎన్నికలు జరగునుండగా.. సిట్టింగ్ ఎంపీ అరవింద్ తిరిగి గ్రౌండ్ వర్క్ మొదలు పెట్టారు. మరోవైపు కాంగ్రెస్ నుంచి ఎమ్మెల్సీ జీవన్ రెడ్డి టికెట్ ఆశిస్తున్నారు. ఈ నేపథ్యంలో జీవన్ రెడ్డిని ఉద్దేశించి అరవింద్ చేసిన వ్యాఖ్యలు హాట్ టాపిక్ గా మారాయి.
