అక్షరటుడే, వెబ్‌డెస్క్‌: ‘మీ టికెట్’ యాప్ మీ దగ్గరుంటే చాలు.. ఆర్టీసీ, మెట్రో టికెట్లు, తెలంగాణలోని అన్ని ప్రముఖ ఆలయాల్లో దర్శనం, ఇతర సేవలు లభించనున్నాయి. ఇకపై టికెట్ల కోసం.. పార్కులు, ఇతర పర్యాటక స్థలాల్లోని క్యూలైన్లలో నిరీక్షించాల్సిన అవసరం లేదు. ఒక్క క్లిక్తో మీ సేవ రూపొందించిన టికెట్ యాప్ లో టికెట్లు పొందవచ్చు. తెలంగాణ డిపార్ట్మెంట్ ఆఫ్ ఎలక్ట్రానిక్స్ సర్వీసెస్ డెలివరీ(ఈఎన్డీ) రూపొందించిన అడ్వాన్స్డ్ ‘మీ టికెట్’ యాప్ ను ఇటీవల ఐటీ, పరిశ్రమల మంత్రి శ్రీధర్ బాబు లాంఛనంగా ప్రారంభించారు. అన్ని రకాల టికెట్ బుకింగ్స్ ఒకే ప్లాట్ ఫాంపైకి తెచ్చేందుకు వీలుగా ఈ యాప్ రూపొందించామని ఆయన తెలిపారు. ఈ యాప్ లో తెలంగాణలోని 15 ప్రముఖ ఆలయాలు, 129 పార్కులు, 54 బోటింగ్ ప్రదేశాలు, జూ, మెట్రో, ఆర్టీసీ, మ్యూజియాలు, ఎంటర్ టైన్ మెంట్ జోన్స్ కు సంబంధించిన టికెట్లు తీసుకోవచ్చు. ఈ యాప్ ద్వారా జీహెచ్ఎంసీ పరిధిలోని కమ్యూనిటీ హాళ్లు, జిమ్ లు, స్పోర్ట్ కాంప్లెక్స్ లు బుకింగ్ చేసుకోవచ్చు. మనం ఎంచుకున్న లొకేషన్ కు సమీప ప్రాంతాల్లోని చూడదగిన ప్రదేశాలుంటే.. ఆ సమాచారం కూడా యాప్ లో వెంటనే అప్డేట్ అవుతుంది. ఈ యాప్ వినియోగం సులువుగా ఉంటుంది. యూపీఐ ద్వారా చెల్లింపులు చేయొచ్చు. అదనంగా ఎలాంటి ఛార్జీలు ఉండవు.
