అక్ష‌ర‌టుడే, వెబ్‌డెస్క్‌ New York : ఇటీవ‌ల కార్చిచ్చులు ప్ర‌జ‌ల‌ని భయాందోళనకి గురి చేస్తున్నాయి. ఎప్పుడు ఏ స‌మ‌యంలో కార్చిచ్చుకి సంబంధించిన వార్త వినాల్సి వ‌స్తుందా అని భ‌యంతో వ‌ణికిపోతున్నారు. అయితే తాజాగా న్యూయార్క్ నగరాన్ని కార్చిచ్చు పొగ కమ్మేస్తుంది. లాంగ్ ఐలాండ్‌లోని హోంప్టన్స్‌లో మంటలు చెలరేగడంతో తీవ్రమైన గాలుల కారణంగా కార్చిచ్చు పొగ ఆకాశమంతటా వ్యాపిస్తోంది. దీంతో ప్రజలు భయాందోళనకి గుర‌వుతున్నారు. అగ్నిమాపక సిబ్బంది మంటలను అదుపు చేసేందుకు ప్రయత్నిస్తుండ‌గా, మంటలు ఎగిసి ప‌డుతున్నాయి.. ఈ దట్టమైన పొగ కారణంగా కొన్ని ప్రధాన రహదారులను అధికారులు మూసివేశారు.
New York : ఎగిసి ప‌డుతున్న మంటలు..
లాంగ్ ఐలాండ్ లోని హోంఫ్టన్స్ లో శనివారం మంటలు ఎగిసిపడ‌డంతో అగ్నిమాపక సిబ్బంది తీవ్రంగా శ్రమించి 50 శాతం అగ్ని కీలలను ఆర్పేశారు. వాహనాలను ఆయా మార్గాల్లో అనుమతించడంలేదు. హోంప్టన్స్‌లో ఉదయం నాలుగు చోట్ల ఎగిసిపడ్డ మంటలు మధ్యాహ్నానికి మోరిచెస్, ఈస్ట్‌పోర్టు, వెస్ట్‌ హోంప్టన్స్‌ సహా పలు ప్రాంతాలకు వ్యాపించాయి. ఈ ప్రమాదంలో రెండు వాణిజ్య భవనాలు పూర్తిగా కాలిపోయాయని అధికారులు పేర్కొన్నారు. అదృష్టవశాత్తూ నివాస సముదాయాలకు నిప్పంటుకోలేదని, ఎలాంటి ప్రాణనష్టం జరగలేదని అధికారులు తెలియ‌జేశారు.
ఇక కార్చిచ్చుతో సిటీలోని పలు ప్రాంతాలను పొగ కమ్మేయడంతో న్యూయార్క్ గవర్నర్ ఆయా ప్రాంతాల్లో ఎమర్జెన్సీ ప్రకటించారు. స్థానికులను అధికారులు సురక్షిత ప్రాంతాలకు తరలిస్తున్నారు. హెలికాప్టర్లతో నీటిని చల్లుతూ మంటలను ఆర్పేందుకు ప్రయత్నిస్తున్నట్లు ఎమర్జెన్సీ అధికారులు తెలిపారు. గత శనివారం మాన్‌హట్టన్‌కు తూర్పున 80 మైళ్ల దూరంలో ఉన్న లాంగ్ ఐలాండ్‌లోని పైన్‌ బారెన్స్‌లో పెద్ద ఎత్తున కార్చిచ్చు చెలరేగడంతో అందుకు సంబంధించిన పలు వీడియోలు కూడా సోష‌ల్ మీడియాలో చ‌క్క‌ర్లు కొట్టాయి.
