అక్షరటుడే, వెబ్డెస్క్: YouTubers | పలువురు ప్రముఖ యూట్యూబర్లకు పోలీసులు షాక్ ఇచ్చారు. బెట్టింగ్ యాప్స్ ప్రమోట్ చేస్తున్న 11 మందిపై సిటీ పోలీసులు కేసు నమోదు చేశారు. హర్షసాయి, విష్ణుప్రియ, సుప్రీత, ఇమ్రాన్ ఖాన్, రీతూ చౌదరి, టేస్టీ తేజ, అజయ్, కిరణ్ గౌడ్, బయ్యా సన్నీ యాదవ్, సుధీర్ రాజులపై కేసులు నమోదయ్యాయి.
YouTubers | డబ్బుల కోసం బెట్టింగ్ యాప్స్ ప్రమోషన్స్
పలువురు ప్రముఖ యూట్యూబర్లు డబ్బుల కోసం బెట్టింగ్ యాప్స్ను ప్రమోట్ చేస్తున్న విషయం తెలిసిందే. చట్టబద్దత లేని బెట్టింగ్ యాప్లను ప్రమోట్ చేస్తూ యువత జీవితాలతో ఆడుకుంటున్నారు. వీరిని ఫాలో అవుతున్న ఎంతో మంది ఆ బెట్టింగ్ యాప్లలో చిక్కుకొని జీవితాలు నాశనం చేసుకుంటున్నారు.
YouTubers | నమ్మి మోసపోతున్న యువత
ఈ మధ్య కాలంలో బెట్టింగ్ యాప్, ట్రేడింగ్ యాప్ల మోసాలకు ఎంతో మంది బలవుతున్నారు. షార్ట్ కట్‌లో డబ్బు సంపాదించాలనే ఆశతో బెట్టింగ్ యాప్ల వైపు ఆకర్శితులవుతున్నారు. లక్షల రూపాయలు అప్పులు చేసి బెట్టింగ్లు పెడుతూ నష్టపోతున్నారు. వారితో పాటు తమ కుటుంబాలను రోడ్డుమీదకు తీసుకువస్తున్న ఘటనలు కోకొల్లలు. నిండా మునిగిన తర్వాత ఏం చేయాలో తెలియక కొందరు ఆత్మహత్యలకు పాల్పడుతున్నారు.
YouTubers | దృష్టి సారించిన పోలీసులు
బెట్టింగ్ యాప్ల ద్వారా మోసపోతున్న ఘటనలు భారీగా పెరిగిపోవడంతో పోలీసులు దృష్టి సారించారు. గత కొన్నిరోజులుగా వరుసగా ఈ యాప్స్ ప్రమోట్ చేస్తున్న వారిపై కేసులు నమోదు చేస్తున్నారు. దీంతో గతంలో బెట్టింగ్ యాప్లను ప్రమోట్ చేసిన వారు బయటకు వచ్చి ప్రజలకు క్షమాపణలు చెబుతుండడంతో పాటు ఇలాంటి యాప్లను నమ్మొద్దని చెబుతున్నారు.
