అక్షరటుడే, వెబ్ డెస్క్: ఏసీబీకి చిక్కిన లింగంపేట ఎస్సై సుధాకర్ అవినీతి ఆరోపణలు అన్నీఇన్నీ కావు. కాసులు లేనిదే ఏ కేసూ ముట్టుకోడని తెలుస్తోంది. ముఖ్యంగా ప్రతి కేసులోనూ డబ్బులు డిమాండ్ చేయడంతో పాటు అక్రమార్కుల నుంచి మామూళ్లు వసూలు చేయించేవాడని సమాచారం. ప్రత్యేకించి పలు కేసుల్లో బయట వ్యక్తుల నుంచి డబ్బులు అడగాలని సిబ్బందిని పురమాయించేవాడని తెలుస్తోంది. దీంతో సిబ్బంది ఎవరికీ చెప్పుకోలేక విసిగివేసారిపోయారు. తాజాగా ఓ వ్యక్తి నుంచి రూ.12,500 లంచం తీసుకుంటూ ఎస్సై ఏసీబీకి దొరికిపోయాడు. వాస్తవానికి ఆయన ఆ సమయానికి ఆన్ డ్యూటీలో లేడు. సెలవులపై వెళ్లిన ఆయన నిజామాబాద్లో ఉండగా.. అక్కడ లంచం డబ్బులు తీసుకుంటూ పట్టుబడ్డాడు. దీంతో ఈయన ఏ స్థాయిలో అవినీతికి పాల్పడుతున్నడో తాజా ఘటనే సాక్షాత్కరిస్తోంది.
వైద్య ఉద్యోగి కేసులో రూ.50వేలు!
వైద్య ఆరోగ్య శాఖకు చెందిన ఓ కాంట్రాక్ట్ ఉద్యోగి డీఎంహెచ్వో అని చెప్పి లింగంపేట మండలంలో పలువురు ఆర్ఎంపీల వద్ద డబ్బులు వసూలు చేశాడు. మెడికల్ ఆఫీసర్గా పరిచయం చేసుకుని పలువురిని బెదిరించడంతో పాటు పెద్ద మొత్తంలో వసూలుకు పాల్పడ్డాడు. ఈ విషయమై ఓ ఆర్ఎంపీకి అనుమానం రాగా వెంటనే ఉన్నతాధికారులు సమాచారం ఇచ్చాడు. ఆరా తీసిన అధికారులు అతడిపై లింగంపేట పోలీస్ స్టేషన్లో ఫిర్యాదు చేశారు. ఈ వ్యవహారంపై విచారణ జరిపిన ఎస్సై సుధాకర్ పెద్ద మొత్తంలో డబ్బులు తీసుకున్నట్లు సమాచారం. వైద్య ఆరోగ్య శాఖలో పనిచేసే ఓ అధికారే ఈ రాయభారం నడిపి స్టేషన్ బెయిల్ ఇచ్చేందుకు రూ.50వేలు ఎస్సైకి సమర్పించడం కొసమెరుపు. ఇలా ప్రతి కేసులోనూ ఎస్సై సుధాకర్ కాసుల కోసం కక్కుర్తి పడటమే చివరికి ఆయన్ను కటకటలాపాలు చేసిందని సొంత స్టేషన్ సిబ్బంది చర్చించుకుంటున్నారు.
