అక్షరటుడే, వెబ్‌డెస్క్‌: పార్లమెంట్‌ ఎన్నికల వేళ బీఆర్‌ఎస్‌ పార్టీకి మరో షాక్‌ తగిలింది. రాష్ట్రంలో కీలకమైన జీహెచ్‌ఎంసీ మేయర్ గద్వాల విజయలక్ష్మి హస్తం కండువా కప్పుకోనున్నారు. ఈరోజు సాయంత్రం సీఎం రేవంత్‌రెడ్డి సమక్షంలో ఆమె కాంగ్రెస్‌లో చేరుతున్నట్లు తెలిసింది. ఇందులో భాగంగానే కాంగ్రెస్ వ్యవహారాల ఇంచార్జీ దీపా దాస్ మున్షీ మేయర్ ఇంటికి వెళ్లి చర్చలు జరిపారు. విజయలక్ష్మి బీఆర్‌ఎస్‌ సీనియర్ నాయకుడు, పార్టీ పార్లమెంటరీ నేత కేశవరావు కూతురు కావడం గమనార్హం. రాష్ట్రంలో కాంగ్రెస్ పార్టీ అధికారంలోకి వచ్చినప్పటికీ.. హైదరాబాద్‌లో మాత్రం ప్రభావం చూపలేకపోయింది. ఈ నేపథ్యంలో రాష్ట్ర రాజధానిలో పట్టు సాధించడంపై హస్తం పార్టీ దృష్టి సారించింది. ఇందుకోసం ఇటీవల ఖైరతాబాద్‌ ఎమ్మెల్యే దానం నాగేందర్‌ను పార్టీలో చేర్చుకుంది. తాజాగా హైదరాబాద్‌ మేయర్ కాంగ్రెస్ గూటికి చేరబోతున్నారు. మరికొందరు సీనియర్ లీడర్లు సైతం కాంగ్రెస్ కండువా కప్పుకుంటారని తెలిసింది.
