అక్షరటుడే, కామారెడ్డి: తమను కుల బహిష్కరణ చేసి ఇబ్బందులకు గురి చేస్తున్నారని తాడ్వాయికి చెందిన సుర్కంటి రాంరెడ్డి ఆవేదన వ్యక్తం చేశాడు. మంగళవారం ఆయన తన కొడుకు ప్రకాష్ రెడ్డితో కలిసి జిల్లా కేంద్రంలోని ప్రెస్ క్లబ్లో మాట్లాడారు. తమ బంధువులతో గొడవ కారణంగా 2023 డిసెంబర్లో రెడ్డి సంఘంలో పంచాయితీ పెట్టారన్నారు. ఆ పంచాయతీకి తాము వెళ్లకపోయినా రూ.5 వేలు కట్టాలని అడగడంతో తాము చెల్లించలేదన్నారు. దీంతో తమను బహిష్కరించి.. 13 నెలలుగా శుభకార్యాలకు, ఏ ఇతర కార్యక్రమాలకు పిలవడం లేదన్నారు. పోలీసులకు ఫిర్యాదు చేస్తే కేసు నమోదు చేసినా కులసంఘ సభ్యులు వినడం లేదని ఆవేదన వ్యక్తం చేశారు.
